نفسي أنا

كلمات: سيد حجاب؟
ألحان: عمار الشريعي
غناء: عمار الشريعي و فرقة الأصدقاء

نفسي أنا
أصرخ بحس عالي
على شمسنا
و أقول لها تعالي
خدي همّنا
و خدي يأسنا
و دوّبي الليالي
و هاتي لنا بكرة أحنّ من أمسنا

يا رب ليه الحقيقة
في الدنيا تايهة و غريقة؟
الكدب ليه توبه زاهي؟
و الدنيا مش زي ما هي؟
دي دنيا دي .. ولا غابة؟
ولا مدينة ملاهي؟
أنا تهت ليه؟ بس مالي؟

دنيا اللي فيها كافيها
طفولتنا ليه ضايعة فيها؟
و شبابنا جوّاه دموعه
لكن بيحلم ببكرة
حابس ضناه بين ضلوعه
و بكرة في القلب فكرة
قرّب يا بكرة و لالي

ما اسمكِ بين الأسامي

شعر: صالح جودت

ألحان: محمود الشريف

غناء: كارم محمود

ما اسمكِ بين الأسامي .. يا فِتنتي يا غرامي
إن قُلتِ أو لم تقولي .. فاسمُكِ أحلى الأسامي

إني أسمّيكِ ليلى .. لتبعثي في خيالي
ذكرى شهيد غرامٍ .. كم عذبته الليالي
جنونه من جنوني .. ضلاله من ضلالي
ما أهون العقل إن لم .. يذهب لوجه الجمال
قولي هل إسمُكِ ليلى .. أم ذاك وحي غرامي
إن قلتِ أو لم تقولي .. فاسمُكِ أحلى الأسامي

هوايَ أدعوكِ نجوى .. لكي أناجيكِ دهري
أم هل أسمّيكِ سلوى .. إذ أنتِ كأسي و خمري؟
أم هل أسمّيكِ رضوى .. إذا رضيتِ بشِعري؟
أم هل أسمّيكِ فدوى .. لأفتديكِ بعمري؟
أم هل أناديكِ نورا .. لكي تنيري ظلامي؟
إن قلتِ أو لم تقولي .. فاسمُكِ أحلى الأسامي

إن الأسامي جميعا .. جمالها لا يفيكِ
فليس في الكون حسنٌ .. إلا تجمّع فيكِ
فما اهتمامي باسم .. من اختيار أبيكِ؟
تخيّري في الأسامي .. و بين جنبيّ نامي
قولي هل إسمُكِ ليلى .. أم ذاك وحي غرامي؟
إن قلتِ أو لم تقولي .. فاسمُكِ أحلى الأسامي

بكرة أجمل م النهارده

كلمات: سيد حجاب
ألحان: عمار الشريعي
غناء: شادية

أما أنا يا ابني شفت لك امبارح حتة حلم
أغرب من أغرب فيلم
شُفت لك الديك بطاقية حمرا و جلابية
واقف بيكلّم شمس الصبحية
يا شموسة يا ام ضفاير دهبية
دهبِك فالصو.. قُصّيه و ارميه

الشمس انكسفت خالص
بقى لونها أصفر خالص
زي لمونة من الدهب الخالص
و انعصرت خالص
و قالت له بصوتها الدهبي
تقصد إيه؟

قال لها
لو سبتي السما و نرلتي السوق
الناس حيبصوا لك من تحت لفوق
و يقولوا
و دي تنفعنا بإيه؟

لو كنتي جنيه
كنت اشتري بيكي مصاصة و بالون اتنطط بيه
لو كنتي جنيه أو حتى قرش نحاس
مش كنتي بقيتي مفيدة لكل الناس؟

فكرّت الشمس الدهبية شوية
و قالت للديك
إنت ولا فاهم حاجة يا ديك
و عامل لي فكيك
ده لولايا عليك
ما كنت طلعت من البيضة
و لا كنت اتعلّمت الغنا و المزازيك

و لولايا على الناس و الدنيا
ما كانتش الأيام البيضا تصبح بيضا
ولا كانت أرض الناس تولد فاكهة
و سنابل و فاصوليا
و لا ورد ندوّبه في كلونيا

الديك المتكلّم .. بلّم
و جري يا فكيك من غير ما يحيّي و لا يسلّم
و صحيت و انا باصرخ و اتكلّم
خدوا كل فلوسي .. ورق و دهب و نحاس
و سيبوا لي الشمس يا ناس
سيبوا لي الشمس يا ناس
سيبوا لي الشمس يا ناس

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده

شُفت يوم عصفورة نونو
لسه طالعة من أودتها
ريشها كان مبلول و لونه
لون غناها و صوصوتها

قمت قُلت ف عقل بالي
بقى دي جناحها يشيلها؟
سِبتها و مشيت في حالي
بعد مدة قلت آجي لها

قال لي واحد من جيرانها
ياه دي طارت ليها مدة
قلت معنى طيرانها
بكرة أجمل م النهارده

شُفت مرة مهرة سمرا
نونو ماسكة ف ديل مامتها
قُلت بكرة حتبقى حرة
تجري وحديها براحتها

عدى شهر و شهر تاني
شُفتها فرسة جميلة
تنطلق تجري ف ثواني
تقطع الرحلة الطويلة

قمت قلت لها قولي لي
ليه بتجري يا مهرة شاردة
قالت الريح بتنادي لي
بكرة أجمل م النهارده

من ورا ستارة الليالي
شمس بكرة جايّة تاني
إحنا شايفينِك تعالي
يا ام ضحكة برتقاني

العروسة الدهبية
جايّة و ف شفايفها وردة
شمس بكرة جايّة جايّة
بكرة أجمل م النهارده

غني يا سمسمية - من فيلم حكايات الغريب

كلمات: محمد أحمد غزالي (الكابتن غزالي)ـ
ألحان: فرقة أولاد الأرض
غناء: فرقة أولاد الأرض - محمد منير

غنّي يا سمسمية
لرصاص البندقية
و لكل إيد قوية
حاضنة زنودها المدافع

غني لكل دارس
في الجامعة و المدارس
لمجد بلاده حارس
من غدر الصهيونية

غنّي لكل عامل
في الريف و في المعامل
بيأدي الواجب كامل
و ادّيله ورده هدية

غنّي و دق الجلاجل
مطرح ضرب القنابل
راح تطرح السنابل
و يصبح خيرها ليّ

أغنيتي فيلم كتيبة الإعدام

كلمات: سيد حجاب
ألحان: عمار الشريعي
غناء: فرقة الأصدقاء

المقدمة:

ملعون في كل كتاب يا عار الخيانة
اللعنة و النار ع اللي خانوا الأمانة
عاشوا على موتنا .. و موتهم حيانا
عليهم اللعنة في ترابنا و سمانا

إتردي يا ابواب البيوت .. و ابعديهم
و إتسدي يا ابواب القلوب .. و اطرديهم
و اتفتحي يا ابواب الجحيم .. و اورديهم
جزاة ما خانونا و باعونا لعدانا

ما تطلعيش يا شمس ع اللي يخونّا
و ما تنطفيش يا نار قلوبنا و عيونّا
و ما ترحميش اللي احنا على قلبه هنّا
و اكوي بنارنا كل نقطة في دمانا

النهاية:ـ

حبيبتي من ضفايرها طل القمر
و بين شفايفها ندى الورد بان
ضحكتها بتهز الشجر و الحجر
و حنانها بيصحّي الحياة في النبات

حبيبتي بتعلّمني أحب الحياة
من حبي فيها حياتي شمس و ربيع
و الحب في الدنيا دي طوق النجاة
لولاه يضيع قلب المحب الوديع

يا حلوة يا بلدنا يا نيل سلسبيل
بحبك انتِ رفعنا راسنا لفوق
لو الزمن ليّل ما يرهبنا ليل
شوقنا في عروقنا يصحّي شمس الشروق

الحلوة قلب كبير يضم الولاد
و زاد و زوادة و ضِلة و سبيل
الموت و الاستشهاد عشانها ميلاد
و كلنا عشّاق ترابها النبيل

محلاك يا مصري

كلمات: صلاح جاهين
لحن: محمد الموجي
غناء: أم كلثوم

محلاك يا مصري و انت ع الدفة
و النصرة عاملة للكنال زفة
يا ولاد بلدنا تعالوا ع الضفة
شاوروا لهم .. غنوا لهم .. و قولوا لهم
ريّسنا قال مفيش محال
راح الدخيل و ابن البلد كفّى

حيوا الرجال السمر فوق السفينة
حيوا اللي جاهدوا عشان ما يفرح وادينا
بصت لنا الدنيا و شافت عملهم
غنّت بكل لسان على كل مينا
يا ولاد بلدنا تعالوا ع الضفة
شاوروا لهم .. غنوا لهم .. و قولوا لهم
ريّسنا قال مفيش محال
راح الدخيل و ابن البلد كفّى

أنا قلبي فاكر لسه مين اللي جارحه
و لولا يوم النصر ما اتلم جرحه
شفت الكنال .. في إيدين رجال من بلادي
رفرف عليهم قلبي من كتر فرحه
يا ولاد بلدنا تعالوا ع الضفة
شاوروا لهم .. غنوا لهم .. و قولوا لهم
ريّسنا قال مفيش محال
راح الدخيل و ابن البلد كفّى

حبايبنا شرق و غرب جايين بلدنا
يشاهدوا نور الحق فوق كل مدنة
و نسيمنا بالأحضان يقابل راياتهم
و كنالنا يحكي لهم حكاية جهادنا
يا ولاد بلدنا تعالوا ع الضفة
شاوروا لهم .. غنوا لهم .. و قولوا لهم
ريّسنا قال مفيش محال
راح الدخيل و ابن البلد كفّى

قول معايا

كلمات: علي سلامة
ألحان: وجيه عزيز
غناء: وجيه عزيز

قول معايا قول بجد
هيه عيشة ولا موتة ولا فوتة ف حارة سد
قول لحد .. أي حد
حد رايح .. حد غايب .. حد جاي
حد لسه فينا فايق .. حد حي
قول يا عم .. قول يا هم
قول لحد لسه فينا عنده دم

قول معايا صوتي لسه ما انتهاش
ليه بنرخص .. ليه بنرضى نبيع بلاش
قول يا عم .. قول يا هم
قول لحد لسه فينا عنده دم
هيه عيشة ولا موتة ولا فوتة ف حارة سد